文章出街當日，Prof J已經離港做埋空中飛人兼公幹中，好似一隻駿馬咁跑嚟跑去（其實成隻死狗至真）！為馬年做好準備！Prof J先祝大家股市馬運亨通，買嗰隻中嗰隻，最緊要身體健康！
環球大方向唔明朗，最緊要係「心正、眼明、腦清」，唔使急，而家最緊要係「定」，自然有錢剩，審時度勢，同Prof J一齊見機行事啦！
新內衣有需求
每逢過新年，老友記特別喜歡紅色，貪佢夠旺，Prof J嘅偶像哥哥，同紅色就夾到不得了！大佬，紅色喎，你估係人都可以「着得」嘅咩！通常呢個時候，紅色相關嘅嘢真係周街都係！呢幾年，大家對內衣嘅概念又完全改變晒，露乜都得，最緊要一個字，就係「型」。係唔係貪靚嘅女士，對內衣嘅要求就越嚟越高！功能內衣又越出越多。
「新正頭」，ProfＪ認識嘅「一班美中女」軍團，例必要整件紅嘢，旺一旺佢，見到Prof J咁樣嘅反應，都係只得一個字——呆，哈！
諗起內衣股，自然諗起今日嘅主角黛麗斯（333），Prof J知道《蘋果》有老友記一早已經搶先介紹咗，Prof J梗係要向同道學習，正所謂教學相長！係唔係？如果冇記錯，2014年1月14日公司出咗盈喜，主要都係嗰個「N稿」——增加產能，告別阿爺國，將產房帶去東南亞，跟住梗係又話業務穩定期！
最後梗係來自控制成本到銷售分銷開支，試圖為公司做咗一個「轉勢點」咁話！即係開始落鑊！
如果係咁，Prof J會以0.43元做支持，破咗0.50元企得穩，再學哥哥嗰句，即係「一追再追」！目標，唔，我諗住0.7大洋先，繼續追蹤，出發！馬年再見！
徐燦傑
中國銀河國際財富管理主管
本欄逢周三刊出