偶像劇嘅老土橋段，通常都離不開一個高富帥嘅男主角、一個「花瓶」，同一個可以陪女主角「市井」地戀愛嘅平民，譜出一段有收視率保證、我愛你你愛他嘅三角戀。不過今次偶像劇男主角換成尼馬，皆因呢位名利雙收嘅巴塞隆拿球星，竟然俾個18歲幼齒撬牆腳！
眾所周知，尼馬有個18歲明星女友，有傳尼馬同布魯娜（Bruna Marquezine）早在舊年12月已經分手，後者更被指變心，戀上巴甲法林明高奀星馬菲斯。雖然馬菲斯喺球壇相對寂寂無聞，不過挾巴西名宿白必圖之子，都係名門之後，當年白必圖經典入球動作都係因佢而生，布魯娜就係為此「搖籃之子」拋棄尼馬。
雖然尼馬並非我杯茶，但馬菲斯外表同星途同樣平平，好可能布魯娜不愛「財」而愛「才」，大家又即管睇吓馬菲斯又係咪球壇可造之材。文：呂晨