【留守香港】
香港政治紛擾不絕，本港營商環境出現轉差「警號」。長實（001）主席李嘉誠雖斷然否認撤資，惟去年頻頻放售中港重要資產，仍難以令人釋疑。作為城中另一大孖沙，呂志和認為現時本港的政治環境複雜，或多或少影響香港的營商氣候。惟他亦強調會繼續留守香港，就算生意難做，亦「兵來將擋，水來土掩」。
雖然呂志和明言無意離開香港，惟近年旗下的家族生意於內地及澳門越做越大，亦早已涉足美國及東南亞等地。相反，香港的業務只保持中規中矩，早前他亦已大嘆現時做生意的競爭越來越大。
「做生意兵來將擋」
呂志和坦言現時的政治生態趨複雜，認為政府要撥亂反正亦非易事，「好多人好希望將管治制度呀，各方面搞得好。但裏面每日發生嘅嘢，你想像唔到。因為個個有自己嘅意願，人嚟㗎嘛，一棵樹都唔係棵棵生得直啦，有時都生啲丫叉出嚟。」
政治氣候轉差，亦令本港的營商環境帶來負面影響。仍屬意留守香港的呂志和亦惟有見步行步，「做生意就兵來將擋，水來土掩囉，冇辦法。你唔知咋嘛，好似法國咁，𠵱家搞到啲有錢佬走晒出嚟」。
不過，呂志和卻不擔心香港會步法國的後塵，將大批富豪迫走。反而在中央「𥄫實」下，難以出現大變。他說：「講真呢度始終係福地，仲有阿爺喺度睇住，唔畀佢走得太歪。阿爺你都睇到啦，香港打個乞嚏呀，都驚到死啦，即刻要派人嚟呀！」
不過近日多家國企開始進佔香港重要業務，例如國家電網入股港燈（2638），令人感到阿爺有意將原有的港商轉莊，呂志和對此不願置評，「去到你講大方向嘅嘢，唔係我哋講㗎喇！」