去年上映嘅電影《狂舞派》贏盡口碑同票房，同時令飾演男主角柒良嘅蔡瀚億（BabyJohn）彈出，人氣急升，佢仲被本報踢爆去年5月同舞台劇演員女友Donut秘婚，成家立室後BabyJohn就更可全心投入演藝工作，佢為咗老婆仔可以過好生活，馮仁昭八到BabyJohn近日賣身畀蕭定一，三年拍六部戲，佢就可以穩袋200萬元過肥年，合約馬年生效。
3月開鏡演監躉
據知，BabyJohn將於3月接拍蕭定一監製、改編自網絡小說《壹獄壹世界》嘅黑色喜劇《高登闊少踎監日記》，佢仲會扮監躉。問BabyJohn馬年首次派利是係咪要加碼？佢噚日喺電話度話：「我未派過，人人有份，希望將祝福送畀大家。」講到同阿一合作，BabyJohn好期待：「好開心繼續有戲拍，我可以喺起步點開始衝刺，拍多啲戲，收入穩定啲，有咗家室要計劃吓。」可介意《高》片做監躉？BabyJohn話：「發哥（周潤發）部《監獄風雲》我好鍾意呀，不過部戲細節仲未落實。」阿一包起BabyJohn三年，呢段期間係咪唔准佢拍其他電影公司嘅戲？阿一話：「我唔會霸權上身，我容許佢拍出面嘅戲，好似《狂舞派3》，想佢選擇好啲，會畀少少意見佢。」
撰文：馮仁昭