實不相暪，上個禮拜尾至今，高明都冇認真睇市望股票，甚至戶口都冇login，除咗因為之前覺得個市唔係咁好避一避，更加係因為有新任務在身。
青姐孫柏文笑談財經事
《蘋果》財經推出新清談節目Cash Canteen，冇錯，個名的確同有線財經旗艦節目「Money Cafe」好似，因為嘉賓主持就係青姐胡孟青，孫柏文亦都係嘉賓，舊底原班人馬過咗嚟再笑談財經大事，區區在下就係負責人、主持同埋打雜，第一集試拍後期製作已經完成，講理財產品之謎，節目剪輯片段已經放咗上蘋果即時新聞試播，希望大家畀啲意見。
至於點解叫Canteen呢？高明想分享一個故事：當年高明去美帝遊學，放午飯時問一個鬼仔：「Where is the canteen？」點知個鬼仔好肉緊咁答：「What？Canteen？This is America。We call it CAFETERIA。」高明覺得，話晒都係香港人，叫Canteen，點都親切啲。
回到正題，瑞信首次評論石藥集團（1093），該股昨升1.6%，報6.49元。
瑞信指石藥成功轉型創新及通用藥物品牌，有160隻藥品，相信很可能錄得巨大的研發開支，料由去年上半年的2.9%升至2016年的約5%，又指該股今年PE為28.9倍，是板塊中最貴，故瑞信首予中性評級，目標價5.97元。
當然，我一開始已講冇睇市，我叫你跟，你都冇信心啦！本欄宣判：唔跟！
高明
http://www.facebook.com/AppleKoming