近排又係內銀老總換音樂椅嘅時候，四大行之一嘅中國銀行（3988）舵手、擔任行長十載嘅李禮輝，噚日正式退休。
雖然冇公佈繼任人，但早前內媒引述佢老哥向中行仝人發出嘅告別信，已披露副行長陳四清將接棒。
李禮輝現年62歲，同舊年退休嘅工行（1398）行長楊凱生等，都係海外媒體最熟識嘅首批資深國有銀行家，李氏更早於2000年亮相本港財金舞台。
當年工行向招商局集團，收購友聯銀行（後稱工銀亞洲）控股權益，當時仲未股改嘅工行，由行長姜建清（現任工行董事長）親臨香江，簽署收購協議。李禮輝時任工行副行長，喺呢單刁出力唔少。
2004年包括中行等國有大行紛紛股改，李禮輝已經調任中行行長，引入蘇皇、瑞銀、李嘉誠基金等策略性股東，又推動中行兩年後先H後A上市，為國有銀行股改上市，立下唔少功勞。