喺十幾年前，因為受某本漫畫影響，港男開口埋口都話要「尋找100分女神」，而喺今時今日，佢哋就當然係「一生只想尋找一個肯捱麥記的女人」；估唔到嘅係，原來周薪3萬鎊（約38萬港元）嘅曼聯新星贊奴沙，佢嘅諗法竟然同港男一樣，甚至連遭遇都勁似，就係不但搵唔到肯同佢捱快餐嘅女友，仲要俾人唱㖭！
約會食炸雞俾人唱
話說一個叫做梅莉莎嘅25歲女學生，佢日前向英傳媒表示，喺上年秋天曾經同曼聯新星贊奴沙有過短暫情緣，可惜最後嫌呢名中場太過「度縮」而斬纜。梅莉莎話佢係透過社交網站而結識贊奴沙嘅，但勢估唔到兩人第一次約會時，贊奴沙係由媽咪送佢去約定相見嘅地方，而之後贊奴沙仲要梅莉莎做司機車佢周圍去，兼且連停車場錢都要梅莉莎畀。
梅莉莎話：「第一次約會我扮到靚靚，化行粧，着晒高跟鞋同短裙，以為佢會揸架靚車嚟接我。點知贊奴沙竟然由阿媽送佢嚟！而佢只係着運動套裝加波鞋出現；最離譜嘅係仲要提議去Nando's（即係類似香港家鄉雞嘅炸雞快餐店）開餐，食18鎊（約226港元）炸雞餐！」梅莉莎又大爆，贊奴沙話佢成日由媽媽幫佢修眉，真係乜嘢形象都冇晒，而佢最後決定飛起贊奴沙，係因為有次約會，贊奴沙唔肯畀40鎊的士費！梅莉莎話：「我覺得一個普通人工嘅男朋友，都會對我好啲囉！」
梅莉莎講到好似飛贊奴沙飛得好有道理咁，但計我求大俠話，後生女始終係後生女，話唔定贊奴沙係想試吓你肯唔肯同佢捱快餐呢？到確認咗正印女友地位之後，先至肯科水，「照顧」你下半生。
莫帥委任朗尼做隊長
講到肯科水，贊奴沙效力嘅曼聯，喺羅致到「8號仔」桑馬達之後，就真係好肯科水擴軍。據報，領隊莫耶斯兩大最新目標，係馬德里體育會嘅前鋒迪亞高哥斯達同埋後衞菲臘路爾斯。另外，為咗振奮士氣，更準備委任前鋒朗尼做隊長㖭！