呢個可能係全世界最貴嘅folder！年幾以來致力爭取同志平權嘅大愛同盟，今年首次殺入維園年宵，新紮師兄唔係以平取勝，反而一個folder賣成120蚊，難怪連立法會議員陳志全都話貴，120蚊喎，鑲金咩？非也，而係有黃耀明同何韻詩赤膊上陣，手箍手力撐平權，大愛話今次明哥詩菇賣肉貴得有道理，因為嚟緊馬年反性傾向歧視法隨時上馬，冇多啲彈藥點頂得住呀？不過年卅將近，folder即日起減到100蚊，捐款繼續不拘，去攤位仲有精美雜誌送回饋支持者。
初哥上陣群情洶湧，但另一邊廂同大愛打大對角嘅支聯會攤位就較為冷清，唔知係華叔去後氣勢不復返，定係年廿七未算多人行，常委張文光擔梯企喺路中心嗌咪勸捐，「大家可唔可以支持吓，全中國唯一嘅六四紀念館呢？」但嗌咗一輪人潮仍然好疏落，難得係有幾個操國語嘅人士派仔女入錢畀支記，今年話晒係六四25周年，希望香港巿民加強後勁，繼續撐住維園燭光。