保安局局長黎棟國前日同政制及內地事務局局長譚志源落維園行年宵派政改揮春同利是封，遇上示威者狙擊，黎局長成功逃脫，扔低譚志源一個受靶，頭部中示威者攬枕、臉中「膠屎」玩具，黎局長就齊齊整整咁喺維園另一處接受記者訪問。有保安局中人噚日同八方講，黎局長當時並冇閃避，只不過，大家當時分工合作，分頭行事，黎局長喺派咗半個鐘傳單後、再應記者要求「扑咪」咁話。哦！咁點解示威者嘅注意力，全部集中喺譚志源身上呢？八方覺得，一來係因為譚志源係政改主將，自然特別惹火，另一個都幾有可能嘅原因，睇怕係維園現場應該冇乜邊幾位市民，認得黎局長係邊個囉。