一連11場的《再世紅梅記》前晚在尖沙嘴演出尾場，演出完畢後藝術總監白雪仙率領全體演員謝幕，大批觀眾衝上前與仙姐合照，現場反應熱烈，仙姐、陳寶珠和梅雪詩（阿嗲）等再度出場謝幕，仙姐與眾人揮手，到後台影大合照時，更肉緊得攬住寶珠姐和阿嗲。
「永遠唔滿意」
事後仙姐受訪時說：「多謝晒大家，兩個月後先喺演藝學院再見，佢哋會喺演藝學院再演出，全部都嚟捧場，不見不散。」對寶珠和阿嗲的表現是否滿意？仙姐說：「永遠唔可以話滿意，如果唔係就會停止進步，佢哋一定要前進前進，我唔識畀分，要觀眾畀，佢哋合格，有60分，剛剛合格，差少少啦。」嚴師出高徒的仙姐直言寶珠和阿嗲都十分乖，坦言會錫晒她們：「全班人都錫晒佢哋，個個都好聽話，好勤力，自己唔覺好辛苦，佢哋乖就值得。」又笑言新年會獎勵她們再排練。
寶珠姐和阿嗲接受訪問時就表示不會覺得辛苦，阿嗲直言冇戲做才會辛苦。寶珠姐說：「一定要用心學，去揣摩角色，師傅教咗好多嘢，好似感情上，每場壓力都大，不過壓力嚟自多方面，壓力係推動力，今次合作好開心，每次開場前我隻手都好凍，每一晚會分六場戲，我做到第五場戲後先好啲，因為所有重頭戲都做完。」對於仙姐給她們60分，寶珠姐大表贊同說：「應該，好多㗎，起碼合格。」
此外，油麻地戲院於兩年前重新裝修後，增加不少粵劇表演機會，粵劇界就此事向立法會議員建議，希望加強戲院配套，羅家英亦覺得戲院大堂太細，對行動不便的長者不方便：「旁邊係垃圾站，氣味好難受，如果要捱臭就由我哋捱，唔好難為觀眾。」
採訪、攝影：藍文浩