隔牆有耳:狼英鬼祟行花市 - 李八方

隔牆有耳:狼英鬼祟行花市 - 李八方

狼振英舊年到維園花市俾示威者狙擊,狼太仲誤中副車,俾長毛擲中「你呃人」咕𠱸,黑面離場。估唔到上任只不過一年半,呢個低民望特首已經要鬼鬼祟祟行花市,噚日下晝去荃灣沙嘴道年宵市場,事前冇通知傳媒,逗留大約半個鐘,用咗628蚊買咗富貴子、日本海棠、火鳥同一帆風順等年花,仲同一班幼稚園學生合照,感覺相當自high。有檔主覺得隻狼好闊綽又親民;但有檔主就話佢直行直過,唔能夠了解民情。
有傳媒收到風,即刻趕去採訪。有記者問佢係咪驚有人示威先嚟荃灣、點解唔通知傳媒,佢都一概唔回應。有心水清嘅網民留言話,因為維園有泛民攤檔,689唔敢去,「鬼鬼祟祟成個賊,又唔敢公開通知人,但又要扮大方去買花」;有網民仲抵死,「689好似一個阿伯咁款,反而林鄭更似特首」。其實政務司司長林鄭月娥日前都有通知傳媒行花墟年宵啦。狼英後來喺網誌話,冇通知傳媒,主要係唔希望有人喺新聞界面前「博出位」以致出現刻意衝擊,對市民同檔主造成影響。如果唔想影響他人,八方建議佢唔好出街,咪做特首囉!