馬雲旗下阿里巴巴與雲鋒基金上周四晚一話計劃入主中信21（241），呢隻股翌日即刻爆升3.7倍。但據知情人士所講，阿里唔可能借殼上市，先唔講阿里估值近萬億元，中信21食佢唔落；最重要係《上市規則》規定借殼上市嘅公司，兩年唔可以注入新資產，馬雲根本冇耐性等兩年。
阿里與馬雲主導嘅雲鋒基金計劃認購中信21超過44億新股，假設呢單刁完成，整間中信21嘅已發行股數逾81億股，以上周五收市價3.92元計算，市值可以去到320億元，但相對阿里最新估值近萬億元，依然相去甚遠，技術上好難食得落阿里。
知情人士指出，除市值問題，另有兩大原因令馬雲唔借呢隻殼上市，其一係《上市規則》要求借殼上市嘅公司，兩年內不能獲注入新資產，否則當係新上市申請。阿里與大股東雅虎之前簽下協議，阿里如果喺明年底前上市，馬雲可以向雅虎回購超過2億股阿里股份，馬雲急住上市都係咁，又點可能等兩年呢？
投資者想得太遠
此外，阿里與雲鋒入主中信21，原大股東中信集團與陳曉穎嘅持股量只係被大幅攤薄，唔係離場，而隨住中信21股價暴升，兩者嘅持股市值已經大幅上升。知情人士認為，阿里大股東雅虎與軟庫唔可能同意阿里借殼上市，因此舉讓中信21嘅原大股東輕易坐享其成。
知情人士話，正如通告所講，阿里入股中信21係要發展國內藥品數據平台，或者再有其他形式合作，投資者可能想得太遠了。
李華華
mailto:[email protected]