與其說闊別十年，倒不如說等了十年，鄒凱光（Matt）終於再有機會執導演筒拍《金雞sss》。邀約訪問談車經，他要求試駕英國車，情迷理由很簡單，「靚囉！有型得嚟感覺低調，嗰啲靚位需要你慢慢欣賞。」着他試駕Aston Martin V12 Vantage S，他這樣答：「試揸？唔好喇！聽聲夠喇！撞咗點算！」無計劃，愛感性，他永遠擺出一副嘆慢板的姿態。
記者：許維雅
攝影：陳國良
邀約鄒凱光訪問試車，循例問他想試駕甚麼車款，他起初說：「次次講完都無，你話我知有乜，方便你啦。」轉頭再說：「如果借到一部開篷Rolls-Royce就好喇。」後來嘗試安排他試駕麥拿倫跑車，他又這樣說：「麥拿倫襯我咩？不如Aston Martin啦，英國車，紳士味道，我着西裝外套影相，感覺還可以。」隨和性格經常予人是是但但的錯覺，其實他是有要求之人。
到拍攝現場，他一見全新Aston Martin V12 Vantage S雙門跑車，就興奮得第一時間跳上司機席，原地踏了幾下油門，「嘩！你聽吓啲聲幾靚！之前同陳奕迅開完會去停車場攞車，佢問我有無興趣睇睇佢部新車。我離遠睇到，已經忍唔住講粗口大讚，佢部開篷Aston Martin真係好靚，佢係英國仔，部車好襯佢，成件事咪啱數囉。佢一邊踩油門一邊吹水，仲話：『仲聽歌？一定係聽引擎聲㗎喇。』踩到我心都郁埋，咁樣就吹咗兩個鐘頭水。我覺得呀，買咗一件嘢返嚟，連朋友都欣賞而唔會覺得你show off，咁係最難嘅，嗰次就畀到我呢種感覺。」
愛低調設計 情迷英國車
對英國品牌汽車特別迷戀，全因他那一代的成長期是活於英國統治下的香港，無論文化、音樂、態度都被潛移默化，其次，他偏愛Aston Martin的細緻工藝和設計，「你睇呢部車嘅中控台，時鐘、操控鍵同黃色縫線等等Detail，幾靚呀！唔太浮誇，但只要你細心欣賞，就會睇得出佢嘅設計心思，呢啲正正係我最鍾意嘅英國人態度、英國味。如果我有機會擁有一架跑車，我一定揀呢部。」坦言暫時未有能力擁有，自己亦不算車癡，但他平時也愛談車經，最喜歡說服朋友買Aston Martin，「有得坐吓都好吖，同埋我好喜歡聽每部車背後嘅故事。同我講得最多車經嘅係俞琤，佢最鍾意身邊人齊齊同佢玩車，佢都有一部，曾經有個國內有錢人仲讚過佢：『先生，有品味！』哈哈哈……」
鄒凱光現在駕駛的是BMW 5系房車，斯斯文文代步用，「我以前喜歡揸SUV款高身車，高高大大幾型仔，後來發覺約女仔出街好大問題，當你扶佢上車嗰陣係有着數，但成件事唔型唔靚嘛，好似要個女仔爬上車咁。我始終有一日會買一部頂級版Range Rover，到死都唔會賣走，呢個係典型男人夢，充滿傳統英式風格，每次睇到英國皇室盛事，一排黑色Range Rover列隊巡航，型到呢！不過暫未係時候。」他對車的喜好只限外形，不愛深入研究性能，叫他試駕V12 Vantage S兩個圈，也被推卻，「試揸？唔好喇！聽聲夠喇！撞咗點算！」
六歲無懼 單獨遊單車河
娛樂圈從來都要講機遇，努力未必跟成績成正比，鄒凱光於電影界浮浮沉沉多年，似乎也沒甚麼抱怨，從來不刻意爭取甚麼。「我喜歡聽天由命，係右腦人，做任何決定都唔會用左腦計算，我鍾意做鄒凱光，喜歡做乜就去做，唔鍾意定任何框架畀自己，只要自己開心就得。好似今次開拍《金雞sss》，係吳君如有日捉住我話：『《金雞》十年喇，不如你幫我搞搞佢啦。』起初以為只係搵我做編劇，點知佢叫我做埋導演，我無諗咁多就一口應承佢，成件事最緊要係大家覺得好玩、開心。」
他的座右銘是「人生最完美的計劃就是無計劃」，愛以感性行事，好像從來也不用為生活折腰，因為沒有家庭壓力？「路係自己揀嘅，我唔要有負擔，所以選擇唔結婚生仔，當然可以瀟灑啲啦，自己都顧唔掂，點顧頭家。父母更加無得怨，係佢哋造就我呢個鄒凱光，媽咪由細到大對我嘅放縱性保護，先會令我有咁嘅性格，佢好似唔在意我做乜，其實一直離遠望實我，久而久知，自由太多，反而令我驚，驚失去咗呢份自由。六歲嗰陣住紅磡，我可以一個人踩住架三輪車去土瓜灣，嗰一刻覺得好開心，亦好怕踩得太遠，下次無得再玩，於是好畀心機踩返屋企。一返到去，我見到媽咪嚇到面都青，但佢繼續扮滿不在乎。𠵱家？當然更加放任。」玩樂人生，促使他的故事笑聲不絕，即使《金雞sss》是回顧這十年怨聲不斷的香港，也是笑位盡出。「無論世界點變，只要做番自己，做番你應該要做嘅角色，做人一樣可以好開心。」
賽車血統 最強Vantage
Aston Martin品牌屬較冷門車系，新車款亦不算多，不過每次有新款推出都令人眼前一亮，就如這部新鮮熱辣抵港的雙門房跑V12 Vantage S，長闊高4,385 ×2,022×1,250mm，單是外形已經相當煞食。
雖然跟Rapide S同樣擁有一台V12引擎，但經廠方多方面調校及提升後，代號AM28的6公升V12動力心臟有更強勁性能，馬力輸出高達573匹，扭力高達620Nm，是Vantage家族中最強悍的旗艦房跑。此外，全新搭載的七前速Sportshift III自動波箱，是由GT3及GTE等賽車系列中研發出來的，不但比之前的六速轉檔更快更靈活，更可以減磅25公斤，造就新車極速達每小時328公里，0-100km/h加速只需3.9秒。
此外，新車引入一套Servotronic電子輔助轉向系統，再配合ADS（Adaptive Damping System）自動調適懸掛系統，令Normal、Sport及Track三種行車模式有着不同駕駛表現，藉此可以提升玩味。為刻意強調源自賽事血統的V12 Vantage S，除了性能，外形上亦花過不少心思，引擎蓋散熱風口及鬼面罩均以碳纖點綴，襯19吋輕量化鍛製黑色輪圈，為新車帶來一絲絲深藏不露的神秘感。
Aston Martin V12 Vantage S
引擎：5,935cc V12引擎
馬力：573ps/6,750rpm
扭力：620Nm/5,750rpm
傳動：七前速Sportshift III自動波
售價：$3,488,000起
查詢： http://astonmartin.com
眼鏡提供：Visual Culture