強國人至愛人龍曲奇餅店Jenny Bakery，舊年由中環萬邦行搬咗去上環，中環萬邦行門口今年即刻回歸平淡，冇咗往年喺馬路邊嘅人龍奇景。聞說，呢間餅店之所以由中環搬去上環，其中一個原因就係被人投訴佢哋一到年尾、年頭就日日引來人龍，阻住其他人做生意，於是要搵地方搬。不過上環店噚日亦已收爐，放假至下月13號，大家唔使去排隊。
上環店大排長龍，華華上周六走去Jenny喺尖沙嘴美麗都大廈嘅分店八卦，呢間舖10點開門，但8點半已經起碼有200人排隊，到開舖時，條人龍幾乎繞住大廈大半個圈，估計有成400人，大部份都係講普通話，唔少人一路排隊一路打電話問親朋戚友要幾多罐，平均等三粒鐘先買到。