說好的調整終於來了！阿根廷政府棄挺貨幣，披索單日急插逾一成，其他新興市場貨幣難逃一跌。避險情緒急升溫，資金全線湧向債市，股市自然冇運行，道指上周五挫318點，港股ADR連22000關都守唔到，今日肯定上演牛仔大屠殺。
其實上星期五，唔少強勢股都已經有散水味道，濠賭、科網、彩票一改炒股唔炒市嘅玩法，部份更跌穿大位，觸發大量沽盤湧現，認真牙煙。
面對市況突然逆轉，唐牛習慣先斬蝕本貨，因為輸錢只有兩個原因︰買得貴或者基本因素較遜色，如果因為後者，弱市下股價只會越跌越深，先分手準沒錯；相反有利潤在手的，質素理應較佳，跌勢因而紓緩之餘，隨時有避險資金追捧，令股價更形堅挺。
早前因美國啟動退市而大跌嘅REITs，經過一輪調整之後，在弱市下有望可重新企穩。置富產託（778）剛公佈去年全年業績，總收益及物業收入淨額分別為13.2億及9.3億銀，按年增長18.3%及17.8%，已連續十年錄得增長，主要受惠於新收購及商場翻新令租金上升。最重要係置富產託派息吸引，每基金單位分派36仙，以上周五收市價5.94元計，息率高達6.1厘，在弱市下不失為一項好投資。
唐牛