大家有冇發現東亞銀行（023）最近喺中環IFC商場搵咗個靚位開分行？喺呢類貴租嘅高檔商場開銀行分行比較少有。
IFC業主之一恒地（012）老闆李兆基做咗多年東亞董事，舊年改由阿仔李家傑做，關係咁好，唔知有冇畀個好價錢東亞呢？
呢間分行認真闊落，一眼望晒成個舖，門口企咗好多位職員，埋邊有個接待處，完全唔似銀行格局。睇東亞網站資料，呢間分行係九間「i-理財中心」之一。
發言人都話，呢間分行走電子路線，客人可以喺自助站理財，如果客戶想買投資產品，又或者搵客戶經理傾，都會有位置招呼佢哋。東亞太子爺李民橋遲吓會搵個吉日落去正式剪綵。
花旗之前都試過短暫落戶IFC，但純粹攝喺新舊兩個租約中間，只係開咗幾個月。至於今次東亞嘅租約去到幾時，發言人就話唔方便評論。