【金鐘】洪欣、蔡少芬（Ada）同陳法蓉幾位好朋友，上周五（24日）約埋陳慧珊一齊喺金鐘港麗酒店食晏，同行仲有Ada、法蓉嘅經理人若蘭。
逐一擁抱
五個女人又食又傾，一路食到下晝兩點半齊齊離開，喺酒店門口，成班女人準備攞車，已經懷孕9個月就生得嘅洪欣，依然健步如飛，Ada就好細心，一直喺旁邊傍實，見到有級樓梯會示意大肚婆小心啲。
陳慧珊同陳法蓉就一支箭去咗攞車，陳慧珊先同法蓉行去法蓉架車度，搬咗架小童單車過自己座駕，相信係好姊妹們送畀陳慧珊個女嘅禮物，臨散band前，陳慧珊逐一同好朋友擁抱道別，跟住就揸車走先。
洪欣、Ada同經理人若蘭就上埋法蓉架車，由法蓉做司機車佢哋走，成班女人都有細路，只得法蓉係單身，唔知食飯時講湊仔經有冇悶親佢呢？
採訪、攝影：潘冠恩