一直都話自己懷舊，如果俾我揀，我絕對覺得Boyzone好過One Direction一萬倍。不過，無可否認，1D係目前全英最紅嘅boy band，所以得知車路士啱啱簽咗1D嘅Niall Horan（圖），就不得不讚車仔領隊摩連奴嘅巿場觸覺兼係廿四孝老竇。
橫睇掂睇，都唔覺得1D嘅成員有幾靚仔，特別係主音兼最紅嘅Harry Styles，我討厭佢嘅程度差啲就拍得住Justin Bieber。不過，我唔鍾意唔緊要，大把人好迷佢哋，而因為1D嘅成員都踢得兩腳，好自然就同英球壇扯上關係，好似Louis Tomlinson早前就簽咗英冠嘅唐卡士打。喺日前，車路士亦簽咗1D嘅Niall Horan。點解車仔要簽佢？原來20歲嘅Niall啱啱接受完膝部手術，車仔簽咗本身係藍戰士球迷嘅佢，等佢可以接受球會一流嘅醫療服務，幫助佢盡快康復，呢招果然互惠互利。
摩佬咁做嘅另外一個原因，係因佢嘅17歲囡囡好迷1D。記得當摩佬仲係皇馬教頭時，亦因囡囡想要1D嘅演唱會飛，而特登邀請1D到皇馬跟操，認真廿四孝老竇！
文：吾中
以女性角度看球星新聞，唔用眉筆用原子筆寫低球壇百態！