【特稿】
范太與馬的緣份，該由她父親徐大統說起。「一滿18歲，我就跟爸爸入馬場；爸爸隻馬贏咗，我就同家姐一齊拉頭馬。」在馬場度過的花樣年華，范太一直與賭神無緣；難得一次「刀仔鋸大樹」，多得方心讓醫生帶挈。
「鍾意馬場氣氛 好relax」
小時候逢周五，父親便做好作戰準備。「每到星期五上晝，佢（徐大統）就已經開始同朋友通電話交換消息；到星期六朝早就更忙，當時只有跑馬地有馬跑，仲只跑星期六日馬，我細個印象馬迷好鬼忙。」
爸爸的投入，令范太對馬場極嚮往，一到成年急不及待跟爸爸入馬場，從此發現另一個世界，「入到馬場，我真係好鍾意嗰種氣氛，大家都係旨在社交，見吓朋友、傾吓偈、食吓嘢咁，好relax」。
愛入馬場卻不懂買馬，范太笑稱她通常只憑馬名下注，「有時爸爸話佢隻馬有機會贏，都會叫我買」，但「幾乎場場輸」，對某次罕有贏錢卻記憶猶新：「有次我喺馬場撞到方心讓醫生，佢就話『Rita，畀個貼士你吖，呢場馬，呢隻搭呢隻吖。』結果我咪聽佢講去買連贏，結果5蚊贏咗3,000蚊。」
父親以外，老公范尚德也是馬迷。范太笑稱丈夫雖然經常入馬場，卻志在與一班朋友鑽研馬匹業績，「唔會（沉迷）賭到褲袋剩番返屋企啲車錢囉」。她後來更與丈夫及兒子當起馬主擁有「另具一格」；但親身拉頭馬機會大減，「因為隻馬好多時贏都係星期三，就算係第一次贏都係星期三，我都去唔到（因為主持立法會會議），都係秘書寫紙仔話畀我聽：你隻馬贏咗呀」。
《蘋果》記者