今季大事擴軍嘅意甲勁旅羅馬,目前喺聯賽緊守次席,上周中意盃8強更加將祖雲達斯踢出局,成績有目共睹;最近呢支首都狼,仲吸引到一名國內大亨注資入股,佢就係中國海航集團嘅董事長陳峰。有指陳峰將會收購羅馬20%股份,投資金額大約喺3,000至3,500萬歐元之間。呢位海航集團巨頭,喺嚟緊大年初九仲會成為奧林匹高球場座上客,欣賞羅馬對拉素嘅意甲首都打吡。