轉會猶如談戀愛，每個人都有個價，而冇一個科學家可以列出方程式話你知點計出個價值，總之有人爭就係天價，冇人爭就係賤價。
轉會猶如談戀愛，情人呢味嘢沒有最好，只有更好，要有更美好嘅將來，心急人嘅方法只有一個，就係換過個情人。轉會格言係有病醫病，冇病強身，唔買都睇吓吖，睇睇吓就買㗎啦，好似行年宵咁。
轉會猶如談戀愛，主動提出分手嘅一定係衰人，俾人飛嗰位一定要傷心。唔想俾人鬧足一世負心人，最好扮晒唔係你開口先，摩連奴話去曼聯係馬達嘅決定，吓？聽落佢先係受害者，聞者流淚。
轉會猶如談戀愛，有錢絕對唔係大晒，不過打橫行嘅通常都係大把錢，大把選擇，只可惜銀碼數字同幸福指數又冇直接關係。
轉會猶如談戀愛，要水到渠成拉埋天窗，外母政策通常都係非常捷徑，好似上年巴塞可以極速搞掂尼馬加盟，原來就係喺背後向尼馬老竇「灌水」，等佢哋一眾安安樂樂畀阿仔出國，只不過原來畀轉會費唔同畀禮金咁簡單，係要交稅嘅，巴塞今次逃稅事件，搞到主席都要做走佬新郎。
轉會猶如談戀愛，要求高得嚟寧缺莫濫嘅人畢竟係少數，大部份嘅饑渴男女都係唔理好醜，最緊要人有我有；結果當然就係，這個世界沒童話，好咗唔使好耐又有下一個轉會窗，到時再血拼過。
轉會猶如談戀愛，最最最冇品，當然就係𡁻完唱，人走咗就數臭前度，點樣燃燒咗佢嘅青春，浪費咗佢嘅光陰，我希望馬達唔係咁嘅人。
轉會猶如談戀愛，最最最低能嘅情人，就係未真正拖到對方隻手，就已經心急到即刻改咗自己facebook個status，慌死人誤會你仲係單身，兼且仲要tag埋未來拖友，諗住逼佢米已成炊㖭，結果隨時嚇走對方，又或者俾人中途截劫，韋斯咸淨係呢個1月，就已經食咗超過10個檸檬，醜死鬼。
轉會猶如談戀愛，你以為係兩個人嘅事，其實阿貓阿狗都好關心你，睇你幾時散！
KEYMAN
now TV主持