【文化差異】正所謂「病從口入，禍從口出！」口出狂言當然令人討厭，不過有時一啲自以為無心插柳嘅說話，最終亦會惹禍上身，成為被圍剿嘅對象。
好似有高登女神之稱嘅官恩娜（Ella）喺報紙專欄寫咗篇文，最初係講以前佢喺英國讀書嗰陣，因為文化背景差異同種族問題惹嚟唔少白眼，最後佢嘅結論係話對住呢啲無可避免嘅文化差異，應該有包容嘅心，大家都係中國人，唔應該自己人笑自己人，畀啲空間去接受佢哋，透過相處得到一種共識，社會就可以存在唔同嘅人同唔同嘅聲音，唔需要太多憎恨同歧視。
「感受吓港人苦況」
就算你係高登女神都冇面畀，網友即刻喺佢嘅fb專頁洗版，有人話：「你入番中國籍，拎番本特區護照先講啦，咪拎住本外國護照叫人包容」、「你去奶粉荒/尿片荒/幼稚園荒/學位荒/工作荒/公屋荒的香港人面前大談包容論，可以平安歸來的話我向你陪罪！」、「對你真係好失望，真的。希望你得閒“微服”落吓銅鑼灣同旺角，逼吓地鐵，感受吓香港人日常生活嘅苦況。到時你就明白，你個句『大家都係中國人』簡直比粗口更難聽。」 場主都有問Ella嘅唱片公司了解吓件事，但聽講話留番聽日（周一）先講喎！
場主：守庫