一月二十日本欄講「香港三寶」，引來回應，聞名泰國嘅陳氏家族第三代，行政會議成員陳智思對左丁山講：「我都唔知在外人眼中，職業訓練教育係香港一寶，睇完你篇文，先知道除ICAC之外，VTC都咁馳名。」又有一位高官講：「香港之職業訓練制度，星加坡最欣賞，一早以香港為師。」既然如此，香港點解唔周圍去宣傳吓，對外推廣呢？恐怕係驚議員批評亂花錢之故。
一位讀者讀後來電郵云：
「拜讀了你今天有關香港有三寶的文章，實在非常認同，在七十年代當時香港的經濟剛起步，技術人力嚴重缺乏，當時政府制定了長遠的人力發展計劃，大力發展職業訓練和教育，職訓局在參考了外國先進的經驗後，積極推行學徒訓練，在短短數年間，為本港培育了超過五萬多名有技術的工人，支援經濟的發展，而然過去十多年，職訓局的重點着重於發展高等職業教育，大力推展與學位有關的課程，例如與海外大學合辦學位銜接課程，甚至成立高等科技教育學院，開辦大學課程，與大學和社區學院直接競爭，忽略了技術人才的培訓，造成多個行業人手短缺，這方面職訓局是責無旁貸的，正如特首在施政報告中指出，主流教育未必適合青年人，亦並不是每個青年人都有能力升讀大學，今次政府計劃將職訓／職教重新檢視，制定策略，更增撥資源，推動學徒訓練，在社區推廣校園發展計劃等，對青年人甚至整個社會都會帶來深遠的影響，希望職訓局亦能積極配合，保持香港三寶的美譽。」
鄭大班讀後亦來電，指香港飛機維修業，世界聞名，港機工程屬下有一間公司HAESL以維修飛機引擎著名，美國飛機亦運來香港俾HAESL維修。鄭大班做飛機維修出身，對飛機工程、維修嘅認識，遠遠超過左丁山，佢話香港學生如在外國大學專修飛機工程，返香港唔憂搵唔到工，有志青年應加入呢一行。佢又通知，香港工程師學會在一月二十五至二十六日，由航空分部（Aircraft Division）舉辦一個「航空業博覽會」（Discover Aviation Careers 2014），呢個博覽會有一大特色，就係勞斯萊斯之引擎Trent 500型號（用於空中巴士A340），重量五噸，造價一億元，將在博覽會展出，運去會展唔簡單㗎，需運費十萬元，不止對航空專業有興趣嘅年青人要去睇，市民亦不妨去參觀，與勞斯萊斯引擎拍照留念！