【銅鑼灣】年近歲晚，好多藝人都出嚟辦年貨，任賢齊前日一家大細出動，特別溫馨。前日下晝4點半，小齊太太Tina喺銅鑼灣利園嘅童裝店幫仔女揀玩具，買完發現有記者喺門外，就施施然坐埋一邊等老公，大約15分鐘後，小齊拖住5歲大囝囝Cody返嚟，而8歲大嘅囡囡Rati就由外傭拖住，不過Rati見到有記者，唔多習慣嬲嬲地咁自己行開，搞到外傭要追住佢。
返台過新年
大約行多5分鐘，再冇收穫，小齊就拖住Cody，Tina拖Rati出嚟，不過Rati都係唔鍾意上鏡，將件衫嘅拉鏈拉到上頭頂，媽咪一路行一路呵住佢。記者問小齊會唔會喺香港過年，小齊好友善咁話：「我哋返台灣過年。」跟住一行五人就去停車場攞車返歸。
採訪、攝影：梁繼光