巴西名將朗拿度昔日馳騁沙場無比英勇，場外感情生活亦都多姿多采，當年佢同美女前妻美蘭妮喺2000年生咗愛情結晶品朗拿德。不經不覺德仔已經13歲，身形仲早熟到你唔信，兼且似乎仲遺傳到佢老竇感情豐富嘅基因，年紀輕輕就墮入情網。德仔最近上載咗佢同佢女朋友嘅相上網晒命，睇相見佢哋打成一片。
講朗拿度嘅情史夠我求驗客寫兩段頭條，佢喺99年同巴西女足球員、當時嘅小美人美蘭妮結婚哄動一時，兩口子喺一年之後就生咗德仔，但佢哋段婚姻到03年就玩完，近十年嚟好似都冇乜美蘭妮嘅消息，我求大俠都有少少掛住佢。
晒恩愛相上網
講番𠵱家已經13歲有多嘅德仔，年紀輕輕但已經周身肌肉，唔講以為已經18歲。至於個樣，除咗對眼似媽媽之外，其他都係似爸爸多啲。德仔最近喺佢Instagram度上載咗幾張相，主要都係同佢女朋友曼妞埃拉嘅合照。雖然唔知曼妞埃拉幾多歲，但目測相信都係同德仔差唔多。
德仔喺張相度亦有寫：「9個月喇，我愛你。」之後佢女友亦都有回應：「我都愛你，喺你身邊呢9個月係我人生最美好嘅階段。」認真人細鬼大骨痹。德仔另一張上載嘅相，除咗有佢哋兩口子之外，仲有佢女友嘅父母，大家似乎相處得好好。
老竇女伴氹氹轉
德仔會唔會好似佢老竇咁，換完一個又一個就真係拭目以待。朗拿度同美蘭妮分手後，曾經同過施卡莉妮、安東妮一齊，08年發生「嫖男妓」事件之後，激到安東妮要同佢解除婚約，不過佢哋繼續一齊，仲同大哨生咗兩個女。加埋一個私生子，朗拿度總共有4個小朋友，到10年佢決定去做結紮手術，咁就點玩都唔怕。大哨𠵱家又有新女友，佢哋最近仲同埋德仔一齊去咗瑞士滑雪。