上季玩完馬後炮，今季就做預言家，同大家一齊睇吓嚟緊周末有咩好睇。今周傾乜：曼城人腳英超之冠？
講到英超牌面最強嘅球隊，可能大家第一隊就講曼城（圖）。不過平心而論，小弟覺得曼城條鋒線夠勁，但中後場仲有好多不足之處，唔一定勁過車路士同阿仙奴。
恕小弟當祖維迪冇到，因為佢今季傷多過踢，咁計法曼城陣中就有3大神鋒，阿古路、尼格度同埋迪斯高。計一流射手，曼聯同利物浦各有兩個，人數上唔夠曼城多。雖然車路士都有丹巴巴亞、費托同埋伊度奧，但點睇都係曼城勁啲，所以話曼城前鋒冠絕英超係合理。不過，中後場呢？
先講攻中，曼城有捷西斯拿華斯、大衛施華同拿斯尼見得人，占士米拿就得個勤力。防中方面，曼城真係祈求耶耶托尼同費蘭甸奴唔好傷，因為替補只係得查維加西亞，實力差好遠。講攻中嘅人數同質素，有夏薩特、奧斯卡杜斯山度士、舒賀爾尼、韋利安同桑馬達嘅車路士點都勁過曼城。就算係阿仙奴，中場人手亦唔差得過曼城。
最後，曼城嘅嘅弱點就喺後防，中堅係得高柏尼穩陣，其餘幾個都係二流中堅。同埋高柏尼成日傷，曼城理應搵番個級數拍得住佢嘅中堅返嚟，等高柏尼傷嘅時候有人主持大局。可能大家會覺得小弟標準太高，曼城陣容已經好勁，但勁還勁，佢嘅陣容亦有缺點，唔算完美，同埋唔一定勁過車路士。文：咖喱