中國星（326）一宣佈供股結果，隨即話可能收購博彩推廣業及集資，但集資兩面睇，可以係好嘢，買。
12月10日主打中國星（0.126元），以集團獲第三洽購澳門蘭桂坊酒店呢壇製作計數，潛在變現21億銀至56億銀（視乎係咪出售埋賭業），相當於每股0.23元及0.6元，係中國星現價（0.143元）1.6倍及4倍。
諗到係，集團潛在套現及增值都勁豐厚！呢壇消息，仲係叫緊糊。
中國星周一宣佈5供2結果，金利豐要包銷12.46億股，佔過半數供股股份。集團跟手再公佈新博彩業大計，或透過配股、可換股證或銀行融資集資。
PB僅0.5倍平通街
咁睇，包銷商上身，視為另類歸邊。中國星新業務搞作，若果真係配股，兼配畀散客，貨源炸散，唔係好合情理。所以，細奀承配人，未必係中國星杯茶。
又連埋供股全面攤薄股數計，中國星現價PB僅得0.5倍，而且集團就快公佈2013年張成績單，應該靚仔，預測PE跌到得6至7倍，炒盈喜同時，亦平霸濠賭界！所以，集團就算配股，仲可以平得去邊？
忽發奇想，假設中國星唔賣酒店，兼掉頭發大嚟搞，以集團省鏡PB、PE，又有冇大孖沙有興趣一齊搞？若果中國星真係新搞作，兼一撼貨形式，配畀場內任何一位賭業大孖沙，咁就夠晒爆炸。
照睇盤路，中國星賣酒店有得炒、盈喜有得炒，即使就算唔賣酒店，配股搞新業務，亦可能係強者收貨嘅格局，一樣有得炒。而集團現價，只係高出供股價0.125元14%，未係啖啖肉，博翻一番到0.286元，中國星得1倍PB，亦未有耐才追到行家3、4、5倍水位。
錢雋
細價股專家
本欄逢周二、五刊出