【記者張嘉雯新加坡直擊】《明報》新總編輯大熱人選、馬來西亞前《南洋商報》總編輯鍾天祥，現居於新加坡，他曾在當地《聯合早報》出任國際新聞組副主任達11年，當地資深傳媒人梁實軒指，新加坡媒體把自己定位為「政府公關」，強項是替政權商賈消毒負面消息，認為鍾不可能突然由「公關」變成「公器」。
「新加坡乜都唔寫得」
「香港同新加坡天淵之別，新加坡乜都唔寫得，香港乜都寫得。」新加坡資深傳媒人梁實軒解釋，當地傳媒分為Singapore Press Holdings和MediaCorp兩大陣營，兩者均與政府關係密切。
「嚟新加坡做生意好好，做錯事、做壞事冇人會講出嚟，政府會幫你、傳媒都會幫你，新聞機構自己慣晒係做宣傳，會幫人搞event、搞function、做埋PR，幫你訪問啲人讚你啲嘢好，all-in-one服務。」梁說。
梁實軒指當地政府多年來嚴密監控傳媒，新聞自由排名在全球179個國家中排名149，難以想像香港傳媒會聘請曾在當地工作的鍾天祥，「你睇吓越南、柬埔寨呢啲國家，全部係我哋新加坡教佢哋㗎，請我哋啲人過去打理傳媒，佢哋啲政府好羨慕我哋對傳媒控制得咁好。」
社會似和諧人民受愚弄
經常在東南亞各國簡介新加坡傳媒現況的梁實軒，有留意香港傳媒被特首恐嚇告誹謗及威脅抽廣告的消息，加上《明報》事件，擔心未來香港傳媒會像新加坡一樣受監控。
梁實軒指當地沒有新聞自由，令新加坡社會表面上看似和諧，人民實質受愚弄，「好多新加坡人唔知自己畀緊好多稅，但享受好少benefits，health care同public housing都有好多問題，都冇人報」。
曾任記者、專欄作家和電台節目主持的他，經常撰文質疑政府開支，他直言在當地批評政府，肯定「冇人請」。已退休的他，現時在當地三大博客寫評論文章，「呢度冇人信報紙，個個朝早起身就係睇blog」。
他解釋，當地傳媒有改新聞的「習慣」，有問題的新聞出街後，很快就會被審查掉。
不想變成新加坡，梁實軒寄語港人「企硬」，傳媒和巿民要團結，「香港傳媒要繼續問應該問的問題，無論邊個做政府，我哋都有權問問題，佢唔答就繼續問，寫出嚟，已經問咗33次喇，但佢仲未答」。