聯儲局本月開始收水後，美元今年展現強勢，各主要貨幣今年都要俯首稱臣，只有紐元、日圓及英鎊例外。在弱勢「瀉」群當中，加元形勢最嚴峻，周初失守1.1大支持位後跌勢加劇，短期形勢仍不樂觀。唔經唔覺，下周聯儲局又議息，加上今次係伯南克最後一次主持大局，Final Encounter是也，自然係焦點所在。
雖然美國上月新增職位得7萬幾份，但根據探子回報，儲局呢個禮拜應該繼續收水，令每月買債規模縮減到650億美元，對美元理應帶來更多支持。美元今年強勢盡現，喺16隻主要貨幣當中，兌其中13隻都有得升，其中以加元最不濟，1月未埋單已累跌4.4%，南非蘭特跌近4%排尾二。而本欄看好嘅紐元則上升約1%，與日圓和英鎊成為逆市之「升」。
當地樓市泡沫最可怕
加拿大央行周三議息後，雖然維持利率於1厘不變，但會後聲明暗示加元太貴，並擔心通脹下行風險增加，等同為加元下跌開綠燈，加元噚日跌到去1.1173兌1美元，再創四年新低，與本欄早前估計，加元失守1.1重要關口，恐出現更大沽壓的情況吻合。
值得注意嘅係，儘管加拿大近期貿易和通脹數據欠佳，但當地熾熱嘅樓市才是最大計時炸彈。根據經濟合作發展組織估計，加國樓價較長期平均水平超標60%，家庭債務指標又創新高，當地家庭平均用三成以上收入供樓，再加上大量房屋正在興建，逾13%勞動人口靠建築業糊口，一旦樓市爆泡沫破，對經濟嘅衝擊難以估計。
英快觸及加息門檻
歐元方面，歐洲昨日出爐嘅1月PMI數據靚，製造業表現是逾兩年半最佳，加上歐洲央行行長德拉吉拍心口話冇通縮，歐元昨日曾抽高逾100點子，上返1.364美元，但只係屬於近期波幅範圍。英國11月失業率出乎意料降至7.1%，相信好快觸及7%嘅加息門檻，雖然英倫銀行早已放風話7%只係參考指標，央行冇咁快會加息，但消息仍刺激英鎊昨日升上1.66美元水平。
匯豐中國1月製造業PMI初值爆冷回落至49.6，喺半年來首次跌穿50點嘅盛衰線，顯示內地製造業活動可能再度收縮，主要貿易夥伴澳洲當然首當其衝。澳元噚日跌落87.64美仙，但其實同上周收市水平相若。姊妹貨幣紐元昨日高見83.26美仙，亦都同上周五相約，兌澳元則升到0.9474，貼近上周嘅八年高位。日本央行本周議息後未有加碼放水，市場缺乏新誘因造淡，日圓短期料繼續靠穩。
展望下周，聯儲局繼續退市可能性頗高，但市場有晒心理準備，股市應該唔會有太大反應，近期積弱嘅加元雖然前景堪憂，但由於本周已累積頗大跌幅，加上淡倉處於近8個月高位，不排除短期出現技術反彈，儲局議息結果公佈前宜觀望。
奇兵
本欄逢周五刊登