去大型財經論壇或者酒會，撞口撞面咁多人，識嘅唔識嘅，要全部認得出都有些少難度。應屆諾貝爾經濟學獎得主席勒（Robert Shiller）近日出席達沃斯世界經濟論壇試用Google Glass後，就覺得呢副眼鏡本身功能一般，如果有埋臉龐辨識功能就正喇。其實Google當初都有呢個諗法，後來因為俾人話侵犯私隱，所以刪除呢個功能；除非用家破解咗部手機，先至可以下載呢類應用程式。
當然，如果只係路人甲行過，就被戴住呢副眼鏡嘅人起晒底就實在太恐怖，於是有人建議，當有好似達沃斯世界經濟論壇呢類大場合，主辦單位就整個應用程式，提供活動相關資料，唔關事嘅就唔放上去，咁就唔會侵犯私隱，又可以方便大家認人。