【叮噹馬頭】唔經唔覺，專門叫人投票揀爛片嘅中國電影金掃帚獎，今年已經搞到第五屆，賽果喺3月3日揭曉，𠵱家先公開網民投票，所以幾時都話呢個世界好公平，好嘢同衰嘢都有佢嘅捧場客，聽講今次投票情況好熱烈，截至目前為止，每一個投票項目都勢均力敵，真係未到最後一刻，都未必知道結果。
華仔入圍
劉德華同林志玲合演嘅《天機．富春山居圖》上映之後，劣評如潮，有網民仲形容為「爛得沒有底線」，點知低處未算低，喺噚日公佈嘅投票形勢，宇宙最強甄子丹竟然喺「最令人失望的男演員」中，因為《在一起》同《特殊身份》呢兩套戲，目前以13,767票領先，有機會成為爛片之王，唔知係咪呢個原因，令同樣入圍嘅華仔未成為網民箭靶！爛片之后由最近雙喜臨門嘅楊冪，憑住《小時代1》同《小時代2》，以15,606票領先，同喺第二位揸住15,254票嘅景甜展開拉鋸戰。
場主：守庫
