May姐萬能雞汁殺入維園年宵！城大管理系八位二年級生食住雞汁熱潮DIY「雞汁咕𠱸」（圖），除咗希望賺過滿堂紅過肥年，亦想用笑聲喚起市民正視電視霸權等社會不公。佢哋喺維園嘅攤檔叫「過馬路汁金」，會出售兩款自家製產品「萬能雞汁咕𠱸」、「放馬過嚟康樂棋」，分別賣$138同$128。有份構思設計嘅林華德話，去年底諗緊年宵產品時，正值港視不獲發牌天怒人怨，佢自己都有去遊行集會撐港視，靈機一觸：「我哋知道呢個社會充斥住好多負面嘅事情，年宵想帶畀大家開心，好似呢個May姐萬能雞汁（咕𠱸），大家笑住都會記起TVB霸權。」
至於康樂棋就大玩本土意識，以公民廣場、光復上水站等做背景，再加入2013年大事元素，好似行行吓會遇上「14巴港女」打到飛起，去到門常開又會被進擊巨人堵路，唔好彩擲到申請電視牌失敗嗰格仲要回到起點㖭。