上季玩完馬後炮，今季就做預言家，同大家一齊睇吓嚟緊周末有咩好睇。今周傾乜：曼城人腳英超之冠？
上星期小弟喺本欄撰寫曼聯，收到讀者朋友寶貴意見，指紅魔鬼今時今日不濟，與陣容實力大不如前，特別係欠缺「改變戰局帶領球隊勝利嘅球星」。其實「改變戰局帶領球隊勝利嘅球星」，唔係你話買就買；就算你擁有潛質嘅新人，都要靠本身訓練系統培養，就好似巴塞慢慢培育美斯一樣。好似皇馬、聖日耳門等富豪球隊買巨星返嚟，但轉會市場同樣有風險，卡卡去到皇馬完全發揮唔到，就代表收購球員潛在風險。曼聯點解冇球星？點解兩屆英超神射手尹佩斯又會被貶為唔係球星，小弟答唔到，但只知道肯定同莫耶斯有關。
講番今日主題，曼城（圖）擁有無限金錢，麾下球星如雲，能夠改變戰局帶領球隊勝利嘅球星確實唔少，阿古路、大衛施華同耶耶托尼都有呢個級數；難得曼城唔似得以往爭標分子咁保守，領先1球就縮，老套啲講：「進攻就係最好嘅防守」，今季已攻入超過100球，就係最好嘅證明。當然冇球隊都係完美，要數曼城弱點真係多，門將赫特呢排打番正選，都周不時犯錯，隊長高柏尼易傷又轉身慢，左閘高拉洛夫同基捷基治都好輕出，領隊比歷連尼都知呢幾個死穴，只好用更強嘅進攻嚟掩蓋，出到歐聯當然蝕底，不過喺英超或者英足盃，對級數較低球隊，夠晒用啦！文：牽牛