狼英聲稱梁班子係歷屆「最多最齊」，可能前面講漏咗「跳船」呢兩隻字。噚晚有傳民政局常秘楊立門同財務局常秘區璟智雙雙遞信，如果係堅，跳船梁班子總共十人，就快儲夠一支足球隊。《主場新聞》噚晚引述消息話，只有53歲、盛傳同林鄭不和嘅楊立門申請提早退休，55歲嘅區璟智就申請如期退休，公務員事務局就話唔評論個別個案。狼英上場以來，平均每兩個月就有人跳船，寫下歷史。而區璟智同事、財務局副局長梁鳳儀舊年11月辭職，成為梁班子「第八跳」。