政圈冇永遠嘅敵人，鏡頭前鬧完，背後可以攬頭攬頸，呢啲先係政客至高境界。美國駐港總領事夏千福去年履新後頻頻落區，話願見香港有「真普選」，同本地政界人士會面時，都談到政改問題，之後外交部駐港特派員宋哲，同千福Baby見面時，唔客氣咁指政改係香港內部事務，外國官員唔應該干涉，中方堅決反對外部勢力插手和干預香港事務，希望美駐港機構同人員唔好以任何藉口，從事與身份不符活動，唔好做任何有損香港繁榮穩定和中美關係大局嘅事。
外交部態度強硬，雙方關係如何，相信唔使八方多講，不過近日八方發現，中、美繼多年前嘅乒乓外交後，近日有一場保齡球外交。
特派員公署網站show合照
特派員公署網站近日公開一幅相片，係公署人員同美領館人員喺保齡球場嘅合照，美領館邀約外交部駐港特派員公署打友誼波。據公署圖文並茂介紹，今個月17號，副特派員胡建中應邀率領佢哋嘅領事部、政研室及國際部等人員，同美國駐港副總領事俞天睦同美領館官員舉行保齡球迎春聯歡活動，話雙方互致新春問候，氣氛活躍，更增進咗相互了解、友誼同合作㖭。據公署網頁資料，以前冇同類「體育外交」活動。
打保齡球相信唔係與身份不符活動，可惜公署冇披露友誼賽結果，當日千福baby同宋哲都冇到場，唔知日後兩人有冇機會一較高下？
mailto:[email protected]