本欄曾於上月中推介威高國際（1173），其後一度高見0.4元，累積升幅逾兩成，經過一輪整固後，噚日再現陽燭，今次有望突破前浪頂，展翅高飛。
短短一個月再推介，當然有嘢要update！主席兼大股東鄭鐘文自上周起密密出手增持，作價介乎0.315至0.332元，持股進一步增加至61.58%，作為最高領導人，對業務肯定暸如指掌，肯真金白銀掃貨，公司前景如何？自己諗吧！
威高主打兩瓣業務，時裝以及化妝品，後者以Colourmix品牌經營，發展一日千里，已經成為集團主要盈利來源，佔比逾九成。唐牛早前行經銅鑼灣駱克道（Sogo後面），除咗周大福同藥房之外，竟然仲見到Colourmix嘅身影，能夠喺呢個超旺位置插旗，一定有番咁上下實力。根據鄰居專欄作家菲菲同Samantha所講，Colourmix賣嘅產品同龍頭莎莎（178）分別不大，但兩者估值卻差天共地︰威高現價市盈率16倍，比起莎莎嘅26倍，大幅折讓近四成，於理不合。睇番中期業績，威高化妝品半年溢利狂升97%，動力澎湃，相反莎莎近月增長明顯放緩，資金換馬有根有據。睇圖表，威高蓄勢突破0.4元大關，下一站直指2010年高位0.55元，屆時估值依然平莎莎一成有多！
唐牛