熱爆嘅夜場股Magnum（2080）噚日掛牌不負眾望，勁飆近九成收市，主席葉茂林心情靚到要派錢，向都係佢做老闆嘅耀才（1428）員工派錢，每人袋1,000蚊，以耀才全部員工約250人計，派咗25萬元。雖然Magnum員工冇錢收，但據聞將會獲發認股權，細節待定。
Magnum嘅上市儀式亦有亮點，電影《喜愛夜蒲》系列導演錢國偉曾經喺Magnum取景拍攝，噚日晨早9點畀面現身半粒鐘，身旁仲有一位穿白色套裝短裙嘅大眼美女，錢導演只簡單介紹佢係美容店老闆Deon Chan。
去蒲幾乎等於飲酒，Magnum就送咗支1.5公升嘅香檳畀港交所做紀念品，價值3,200元，上面用閃石砌成「MAGNUM」 同「HKExListing」字樣，唔知港交所（388）CEO李小加打算幾時乾咗佢呢？