肥媽瑪利亞昨於炮台山出席RoadShow頒獎禮，身為演藝人協會理事的肥媽表示有留意選會長風波，問她是否有意做會長？她說：「邊個講？你哋唔係會員，得記者講有鬼用？我冇諗過，打嚟問好突然，等2月開會，係咪14號開就唔知。」講到黃秋生表明擱置角逐會長，肥媽說：「咁快？冇聽過，我啱啱返。」秋生不想選是否因為沒有人跟進他入會？肥媽說：「我唔信，好相信秘書處唔會做唔通知人嘅事，前會長（曾志偉）、王祖藍有份叫秋生，冇可能冇通知。」
肥媽表示推舉丁羽做會長：「我代表自己，推舉丁羽叔做會長，佢喺贊助、內部嘢出唔少力。我唔係幫芷菁，但我六年班都未畢業，有啲法律上嘅嘢係要執，會員投訴嘅法律責任邊個負責？有睇新聞，佢哋十冤九仇咩？大家為個會好，秋生係有資格，但丁羽叔老資格、心平氣和、內斂。好多嘢做，丁羽叔由頭做到尾，由未有會址到𠵱家，成日話幫老臣子，但冇老點有新？最好秋生加丁羽叔，有新有舊一齊做。」
問到是否搞雙會長？肥媽則說：「如果可以會提出，A line、B line咁，年輕化，分會我知係得，後生一班，老一班。」老青合不來？她說：「可以共處，香港老化，需要年輕人幫，點解成立個會係怕藝人俾人蝦？大家演藝人，多一事不如少一事，希望和諧，家和萬事興，協會係縮影嘅香港，人要敬老，老要接受新事物，一人行一步就乜事都冇。」
秋生：我唔搞喇
對於肥媽的提議，黃秋生昨接受電話訪問時表示不願置評：「是但啦，我唔搞喇！幾多個會長冇所謂，唔關我事就唔理，祝佢會務興隆啦，我都唔會入會。」
採訪、攝影：林嘉慈