很久TOM集團（2383）都未享受過在鎂光燈下的快感，噚日氣勢如虹勁升19%。話說阿娘晚上靜悄悄走入嚟問TOM仔。「咁識貨？呢隻五日升近一倍。」阿娘臉有難色，原來係啱啱先返家鄉，沽唔沽好，Samantha突然對阿娘肅然起敬，眼前簡直是翻版阿信，忍辱負重收埋呢隻蟹咗的股票十個寒暑，今次TOM仔「愛回家」真係守得雲開。
TOM集團與官方郵政中郵合作，成立新合營公司「郵樂控股」發展電子商貿，郵樂網在2010年開業，是一家綜合B2C的購物平台，同其他商城一樣，產品種類包羅萬有，但獨特的是他們有線下實體店，勝算是中郵自己都做物流，淘寶速遞通常有兩種選擇，一是順豐，二是EMS，EMS正是中郵旗下直屬全資公司，中郵可謂包攬電子商貿全條的產業鏈，萬事俱備，能否壯大就睇TOM在網上技術和運營策略同對手一決高下。
除了電子商貿引來憧憬，爆炒相信是引入第三方投資者錄得約15億的股東應佔收益，當中13億會在2013年入賬，睇番過去幾年TOM仔蝕錢以億計，呢次收益簡直久旱逢甘露。聽完，阿娘已經不耐煩話最怕同TOM仔廝守多個十年，究竟幾時沽好，只好建議以每日收市價作為止賺位，一旦跌穿就沽貨。
Samantha
本欄逢周一、三、五刊出