香港公共財政紀律，好多人以為唔重要，一眾梁粉追殺財爺，殺到雙眼充血，疾言厲色，大家心諗，點解咁大仇口。親梁地產商不遲不早，偏偏呢個時候逼財政司司長開倉，坦白講，呢棚人有幾多社會良心去追求公義，幾十年來香港人看在眼裏。新世界（017）主席鄭家純早前話用一半財政儲備去扶貧，你話幾咁關懷弱小。
香港財政獨立自主，唔好使到見紅，唔單止係《基本法》要求，亦關乎到香港高度自治。老董當年搞到一鑊粥，公帑用去起樓，搞高科技大躍進，唔理亞洲金融風暴對公共財政之衝擊，連續五年見紅，其客觀政治後果，就係要靠中央打救，自由行政策在此背景下出台，香港變成越來越依賴內地畀政策，而自此之後，香港就如一個靠生活補助過活嘅人，不能自拔。
梁振英大言炎炎，指經濟發展可以令政府收入擴張，足以應付經常開支增長，佢未必呃人，因為按佢部署，應該先谷大政府福利開支，到公眾恐懼財政赤字，要求開源時，明年施政報告就會以發展經濟為主調，力推內交，粵港融合，甚至將儲備用於內地作所謂策略性投資買地。他將曾蔭權年代定下之優勢產業政策全部推倒，粉嶺皇后山私立大學用地夾硬要改去起樓，將自力更生一改為全面北望。
呢盤棋再捉落去，五年之後，香港將全面由第N個五年計劃控制，而當公共財政乾塘後，試問邊個做特首都好，都要仰廣東省及北京鼻息，仲想抬起頭述職？
一次過派錢冇咁傷
開發東大嶼山CBD，橋頭堡經濟、航天城，全部都只有一個目標，就係將香港變成澳門，由多元、國際化變成一元化、內地化。
今時今日，政府處事根本毫無政策理性可言，毋須論證，一切政治掛帥。林行止暗批梁特首只懂向北望，講出眾多港人心聲。香港公共財政自主獨立性，已是最後堡壘，將經常開支大幅膨脹，同曾蔭權one off派錢係兩回事，一次過派錢先至唔會傷及筋骨，有盈餘先至派，總好過年年派、月月派，雙曾有足夠智慧，去維持本地財政獨立性，如果唔係，仲邊有乜嘢高度自治可言。
本來中央也無要求香港走福利主義這條路，奈何林鄭月娥上位心切，罔顧多年政務官的價值理念，搖身一變，成了民粹政客，與一眾梁粉聯手打擊財政司。
香港政局之敗壞，至今為烈，猶甚於董朝，有原則之政務官，早已意興闌珊，陸續起身，離開政府，唔想再日日篤眼篤鼻，索性冇眼睇。
添馬男