唔知球迷記唔記得廿年前有個PC遊戲叫《三國志2》，如果主帥戰死，所有武將的忠誠度都會大降，很易被挖角，甚至打仗時被收買倒戈。現在曼聯的情況不是很似嗎？費Sir離隊後，朗尼、維迪都想走；未至有武將臨陣倒戈，但眾將不止忠誠度大跌，連團結精神和鬥心也蕩然無存。
曼聯現時對下游難言穩勝、對中游唔輸算好、對前列輸少當贏！莫耶斯還說爭標未絕望？球迷不禁回應：「仲講呢啲……」摩佬加一句：「希望紅魔爭到前4。」那我想問問摩佬，在曼聯前面的紅軍、熱刺、愛華頓會被曼聯追過嗎？除非熱刺未炒波亞斯啦。我相信紅魔迷要有心理準備，球隊會以第6位甚至更差的排名完成今季英超。我身邊有朋友更悲觀，將曼聯比作上世紀80年代的利物浦，王朝由盛轉衰後，超過廿年也未有機會贏聯賽冠軍！
上述說法無疑誇了點，但曼聯所陷的困局確實嚴峻。如很多球迷，我都曾講笑說：「費sir快啲復出啦！」但現在攤子如此爛，若我是已在高峯時風光離場的費sir，點會咁儍回巢？
唯一翻身之路，是「雲格模式」：一位善於提拔小將的主帥，配合4、5位貴價球星，但球壇又有多少個雲格呢？
方柏翹
now足球評述員