【銅鑼灣】九十年代樂壇天后、現年44歲嘅彭羚（Cass）自從嫁咗畀林海峰之後，一直專心相夫教女，前年破例出山撐老友黃偉文嘅作品展，再踏紅館開金口唱《小玩意》同《漩渦》等金曲，當時外界反應熱烈，大家都好希望佢復出，不過Cass都冇動搖過，依然將全副精神放喺屋企，繼續專心做全職媽咪。
越大越靚女
前日下晝4點幾，Cass同大女林泳孖住喺銅鑼灣禮頓道行街睇衫，唔經唔覺，下個月14日情人節係林泳嘅14歲生日，佢同爸爸林海峰生成餅印咁，越大越標致靚女，而且高得好快，已經高過媽咪Cass喇，仲散發少女味，而Cass又keep得好好，霎眼睇佢哋似兩姊妹多過似兩母女！
話晒都係昔日樂壇天后，Cass入咗時裝店後，唔少sales都主動走去介紹新衫。睇咗15分鐘左右，兩母女各有各睇多一陣，不過都未有收穫。跟住佢哋走咗去隔籬間Starbucks買咖啡，見佢兩個好好傾，講到唔停，睇嚟佢哋感情好好。攞咗杯咖啡之後，佢哋就齊齊行去禮頓中心停車場攞車走人！
採訪、攝影：羅德光
