狼英啱啱發表嘅施政報告，據講林鄭月娥先係幕後話事人，一直𥄫實份報告點寫，以免有乜嘢事又要幫佢揹。八方最近聽聞，原先政府放風話會研究「取消強積金對沖」，最終冇咗影，隻字不提，就係林鄭睇完覺得唔對路，喺最後關頭抆走呢一part。
避免商界反彈
強積金對沖機制，即係僱主提取強積金嘅僱主供款，抵銷長期服務金或遣散費，減少僱主結業時嘅開支，所以勞工界一直都要求取消對沖，保障打工仔。工聯會嫻姐早前更就此向狼英追數，問佢點解唔喺施政報告度話取消，質疑佢怕咗商界。
政圈流傳狼英確實係想取消對沖機制，仲寫埋入施政報告嘅起草稿之中，但林鄭睇到後又覺得唔對路，一嚟因為講得出未必做得到，唔太可行；二嚟認為應該深思熟慮先搞喎，因為一提出，商界必定反彈，唔通嫌政府仲未夠多敵人咩，梗係唔提好過提啦。
據聞四大商會月初同狼振英會面傾呢單嘢時，林鄭仲未出手，幾乎係喺施政報告發表前一星期，林鄭先一錘定音決定抆走。如果商界要就此畀掌聲，應該畀林鄭而唔係狼英；唔知2017年特首選舉，商界又肯唔肯畀票林鄭呢？
mailto:[email protected]