78歲嘅合和實業（054）主席胡應湘（哥頓），噚日以香港城市大學校董會前主席身份，出席城大30周年校慶，可惜佢趕住鬆人，對施政報告同財政預算案等問題，都耍手擰頭話「今日唔講喇」，明顯係費事捲入政治漩渦。
其實哥頓舊年已經鬧過政府一輪，仲話𠵱家嘅投資環境影響佢嘅投資信心，或者佢見就快過年，費事再鬧人。政治問題唔講，問佢諗住點樣過今個農曆新年，佢就輕鬆咁話，打算去日本滑雪，胡太同阿仔胡文新都會一齊去。
哥頓喺2004至2006年期間出任城大校董會主席，當年仲捐出2,500萬元畀城大興建新校舍，成為胡氏家族向本港大學捐款最大筆捐款額。佢致辭時大讚，城大過去30年，聲譽同地位越來越好，已走向國際化，校園設施又採用唔少新科技，運作模式夠晒環保咁話。