美國大學籃球聯賽又叫「三月瘋」，係美國體壇數一數二嘅盛事，今年比賽應該更加搶眼，事關「股神」畢菲特旗下巴郡最近同貸款公司Quicken Loans合作開盤，任何人只要估中聯賽淘汰賽全部67場賽果，最多可以贏走10億美元（約78億港元）。
股神當然唔會咁容易輸10億美元，有專家計過，要估中咁多場嘅賽果，中獎機會率相當於連中三次六合彩。而且，今次僅限1,000萬人參加。股神話，如果有人一直估中賽果，估到入總決賽，就會邀請佢一齊睇，仲會袋定張支票，一贏就送畀對方，不過佢到時就好難戥對方開心喇。
幸運兒可以選擇分40年，每年攞2,500萬美元，如果要一次過攞，只係攞到5億美元。如果冇人估中晒，股神都會向估得最準嘅20名參賽者，每位送10萬美元。