抽廣告有冇用？大家睇吓am730大老細施永青日日向肥佬黎開拖就知道，絕對有影響，但對挽救將再創新低嘅特首民望，應該全無幫助，施永青要大鑼大鼓顯示效忠，為自己多過為梁振英。另一邊廂肥佬黎上志雲大師節目吐苦水，指抽廣告一年唔見兩個億。昨日由曾德成口中證實梁振英不出席渣馬起步禮，可見逼渣打抽廣告並非傳言咁簡單，must be something！
有為政府 以理據說服反對者
而家香港做生意都搞到要歸邊，政治掛帥，真係玩完。曾經何時，香港由殖民地七十年代開始，逐漸建立一套相對文明嘅管治模式，以理性、常識、程序公義為本，擺脫意識形態政治。當年英國人唔想香港捲入國共之爭，恐怕香港成為意識形態戰場，結果塑造咗香港核心管治理念。
一個有為且成熟嘅政府，係會用理性、文明方式說服反對者，係唔使粗暴地以脅迫、抽廣告、換老總等方法令對方就範。以往一個新聞官已經可以用方法慢慢影響批評政府之記者，原因在於「理據」二字，win the argument。當政府政策出台前，必須經政務官反覆討論先上立法局公佈，亦會有社會公信力之third party endorser，幫助宣傳推銷。上述良政善治，被梁振英成熟一項推出一項的香港速度所摧毀。大家從低收入在職援助出台前後可見，此乃重大社福政策及理財哲學改變，政府內部矛盾未擺平，冇醞釀，濕𣲷𣲷就攞上枱，俾傳媒插乃理所當然，唔插先奇。
香港當前深層次矛盾，在於一個落後嘅政治核心，面對一個先進國際城市所產生巨大落差，於是惟有採取諉過傳媒去作掩飾，一時歸咎年輕人冇屋住、欠缺社會流動，一時又歸咎新媒體興風作浪，一時歸咎phone in主持港台節目，一時又歸咎報紙老總唔聽話，乜理由都講哂，但唯一就係冇聽到王光亞話：「找到不足」。
社會變革乃全球化趨勢，與近十年資訊科技革命有關，傳媒權力下放有關，人人有自己觀點，個個可以吹雞上街。唯一應對方法只有在價值、理性層面win the argument，贏取民心。香港文明政治，係英國人留低的重要資產，拒絕意識形態，拒絕極端政治，成功令到香港度過了冷戰對壘，內地文革癲狂歲月。
政治文明建立經歷百多年，要摧毀五年就足夠。在內地政治黑暗時，人人為意識形態所折磨，香港一點燈光足以令幾十萬內地人拚命游水過來。香港文明的淪喪，已經寫在牆上。
添馬男