「小小超」李澤楷私人投資嘅富衛保險，開業約半年動作多多，先請來夏佳理做主席，之後搵馬時亨做獨董，最近又喺尖沙嘴麼地道租落一個地舖做旗艦店，以保險公司來講比較罕見，斷估好少人會行行吓街走入保險公司買份保單啩。小小超果然夠豪，為提高知名度，重本租地舖當宣傳都唔計較！
近年旺區地舖嘅租金被外國品牌或者鐘錶金舖搶高晒，做零售都話合情合理，賣保險真係好少租地舖，通常租寫字樓。而根據土地註冊處資料，富衛呢個尖沙嘴地舖月租65萬元。富衛原先喺上環有個地舖，今年上半年計劃喺沙田同觀塘等人流多嘅地區再開地舖，真係好落本。
主席夏佳理噚日喺新舖開張儀式上亦期望，公司三年內打入香港保險市場前五名，咁進取，旁邊嘅CEO黃大偉聽到都嚇一跳，即刻解畫話董事局有個進取目標，但管理層就希望五年內打入五大。