當武打影星陳惠敏遇上新進女歌手陳慧敏會係點？真實對白係咁嘅，陳惠敏：「唔識，新人？新歌星呀？」陳慧敏則自我介紹：「四年前參加咗歌唱比賽，主持森美介紹我出場用咗你個名，之後啲朋友就開始叫我做慧敏哥，我好想多謝你，因為叨咗你光。」陳惠敏即收起平日嘅霸氣回應：「唔好咁講。」
「辛苦嘢等男人做」
噚日nowTV觀星台搵咗兩個惠／慧敏做《Spot Light》節目訪問嘉賓，佢哋喺紅磡一間紅酒舖錄影，陳惠敏話：「𠵱家啲新人邊識吖，都冇留意樂壇，電影新人都唔識啦，佢哋都未必識我呢啲老前輩，個個都話唱歌，嗰個志雄，《古惑仔》嗰個呀，都話自己喺大陸唱歌登台，唱歌？佢連講嘢都走音啦，仲話唱咗幾十場㖭喎。」
唔知惠敏哥認識啲乜嘢新歌手呢？佢話：「阿Sa（蔡卓妍）、阿嬌（鍾欣潼）都識，不過都唔係新人囉，我𠵱家同阿Sa、秋生拍緊《大茶飯》，我知秋生同嗰個陳乜嘢菁（陳芷菁）爭嘛，我認為女仔應該返去煮飯畀老公食，辛苦嘢等男人去做。」另外，陳慧敏話見到惠敏哥真人好有壓力同緊張，但好多謝佢，當年都係因為借對方個名至俾人記得。
撰文：馮仁昭