內地節目《我是歌手2》，成功令大家重新留意歌手鄧紫棋，更令佢身價抽升，聽講已吸金超過2,000萬。香港樂壇一潭死水，如果冇內地呢個節目，恐怕一位咁勁嘅歌手仍半紅不黑。
節目大熱，受惠嘅仲有個電視台。冠名贊助嘅立白集團，贊助額達2.35億人仔；加埋其他唔同形式廣告，估計有成11億人仔。至於節目獨家網絡播放平台樂視網，亦因為呢個節目賺咗2億人仔，實行網、台合作，有錢齊齊搵。
現今多煤體當道，各大品牌都樂意大灑金錢，為求於《我是歌手2》中亮相。以東風（489）日產為例，節目中歌手齊齊坐旗下model天籟公爵，當鏡頭影住曹格喺車入面講嘢時，有意無意都會影到個logo，但植入式廣告唔係次次work，上次TVB搵May姐硬銷雞汁，就係一大失敗例子。不過今次東風就明顯得米，上網見到網民一致話覺得架車好有霸氣。
廣告早已跳出平面框框，品牌如果想接觸後生一輩，單落平面廣告可以話死硬。海爾（1169）就去得更盡，最近公佈唔會再落雜誌廣告，但強調會繼續落雜誌內文植入廣告或者新媒體廣告。而家海爾要大搞智能家電，過去2年不斷撬走百度、騰訊等公司的人才。今次呢個舉動，更加證明海爾有決心，將傳統帶去科網新世界。
Fifi
本欄逢周二、四刊出