本周六維園年宵開幕，政黨各出奇「貨」擺檔撲水。論創意，民主黨創意贏晒，以「餵689食屎」做賣點，因為佢哋今年賣廁紙，四卷叫價68.9元，白鴿黨聲稱有助消除民「憤」，皆因佢哋將一掟成名嘅路姆西，同狼英CY個嘜頭印上廁紙，「辦大事」可以「吻」別狼英。民主黨創意媒體部部長黎敬瑋話，廁紙質量好唔甩色，堅韌度同狼英臉皮一樣，限量1,000份。
公民黨既然畀人叫做公文袋，賣袋就最match。印有余若薇墨寶嘅「不在沉默中爆發，便在沉默中滅亡」、「認真就輸了」兩款tote bag，每款108蚊；袋巾出品嘅「我是一個公文袋」文件布袋，最啱裝平板電腦。佢哋亦推出每隻28蚊嘅玩具小馬，最啱大家用嚟跑馬仔。
工黨文件夾有明哥簽名
工黨就推出印上「revolution」嘅頸巾，黑、橙兩款，每條一百蚊，仲有兩款「彩虹」同「六四」為題嘅文件夾，部份仲有黃耀明同王丹簽名。